The Mindat Post
၁၉ မေ ၊ ၂၀၂၂
မင်းတပ်မြို့တွင် အခြေခံစားသောက်ကုန်များ ပြတ်လပ်နေ၊ မြို့တွင်း တိုက်ပွဲဖြစ်လာနိုင်သည့် သတင်းများ ပျံ့နှံ့လျက်ရှိ ကြောင်း ဒေသခံပြည်သူများထံမှ သိရသည်။
“အသား ငါး ဟင်းသီးဟင်းရွက် ကြက်ဥကအစ အကုန်ပြတ်လပ်နေတယ်၊ ကားမထွက်တာကြာလို့ အခြေခံ စားသောက်ကုန်တွေ ပြတ်လပ်နေတဲ့ အခြေအနေပါ” ဟူ၍ မင်းတပ်မြို့ပေါ် ဘုန်းတော်ကြီးကျောင်းတွင် သီတင်းသုံးနေထိုင်လျက်ရှိသည့် ရဟန်း တစ်ပါးက The Mindat Post သို့ ပြောသည်။
“ကွမ်း အရမ်းကြိုက်တဲ့ ဦးဇင်းတောင် ကွမ်းယာ မစားရတာ တစ်ပတ်ရှိတော့မယ်၊ ကွမ်းသီး ထိုင်ဝါးနေရတယ်။ အဓိက နောက်တစ်ချက်အနေနဲ့ ယောနယ်ဘက်က ဟင်းသီး ဟင်းရွက်ဈေးသည်တွေ တက်မလာကြတော့တာ တော်တော်ကိုကြာနေပြီ” ဟု ဦးဇင်းက ဆက်၍ပြောသည်။
“စားသောက်ကုန်တွေ စျေးတက်လာတယ်၊ ရှားပါးလာတယ်၊ တိုက်ပွဲတွေက တောက်လျှောက်ရှိနေတော့ အလုပ်အကိုင်နှင့် ဝင်ငွေက မရှိကြပြန်ဘူး၊ တော်တော်ကို ဒုက္ခရောက်နေတဲ့ အနေအထားပါ” ဟူ၍ မင်းတပ်မြို့တွင်းနေ ပြည်သူတစ်ဦးက The Mindat Post သို့ပြောသည်။
“မြို့တွင်းမှာ တိုက်ပွဲတွေ ဖြစ်လာနိုင်တယ်ဆိုပြီး သတင်းတွေလည်း ဟိုတစ်စ ဒီတစ်စ ကြားနေရတယ်၊ အင်တာနက်တွေ၊ ဖုန်းလိုင်းတွေ ခက်ခဲနေတော့ ဘယ်ဟာက အမှန်ဆိုတာ သေချာ အတည်ပြုဖို့ မလွယ်ဘူး။ မြို့ပေါ်ကနေ ထပ်ရှောင်ရမလိုလို၊ ဘာလိုလိုတွေပေါ့။ ဘာမှ ဆက်မဖြစ်လာပါစေနဲ့လို့ ဆုတောင်းရင်း ဘုရားတနေရတယ်” ဟု ၎င်းက ဆက်၍ပြောသည်။
ပြည်ပရောက် မင်းတပ်မြို့ဒေသခံ အမျိုးသားတစ်ဦးကတော့ “ဒီတစ်ခေါက် တိုက်ပွဲတွေသာ ထပ်ဖြစ်လာရင် ဘယ်သူ့အတွက်မှ လွယ်မယ် မထင်ဘူး၊ ယခင်ကထက် ပိုပြီး ပြင်းထန်လာနိုင်တယ်လို့ မြင်တယ်။ အားလုံး ဆင်းရဲ ဒုက္ခရောက်နေတာ မြင်ရ ကြားရ ၊ ကိုယ့် မိသားစုဝင်တွေပါ ကြုံနေကြရတော့ ဒီလိုတွေ ထပ်မဖြစ်စေချင်ပါဘူး” ဟု သုံးသပ်ပြောဆိုသည်။
ဆက်လက်၍ မင်းတပ်မြို့တွင်းနေ အမျိုးသမီးတစ်ဦးက “ဟာသလို့ ပြောရမလား စိတ်မကောင်းစရာပဲ ပြောရမလား တချို့တွေက မပြေးတော့ဘူး၊ မြန်မြန်သေလည်း နားအေးတာပဲဆိုတဲ့ သူတွေကလည်း ရှိနေတယ်၊ စိတ်တော့ မကောင်းဘူး” ဟုဆိုသည်။
ယခုနှစ်ဧပြီလလယ်ပိုင်းမှစ၍ မတူပီမှ မင်းတပ်မြို့ဘက်သို့ ပြန်ဆင်းလာခဲ့သော စစ်ကောင်စီယာဉ်တန်းကို CDF မင်းတပ်က ကြားဖြတ်တိုက်ခိုက်ခဲ့ပြီး စစ်ကောင်စီဘက်တွင် ထိခိုက်ကျဆုံး အများအပြားရှိခဲ့ကြောင်း CDF မင်းတပ်၏ သတင်းထုတ်ပြန်ချက်များအရ သိရသည်။
#themindatpost #foodsupplyshortage #မင်းတပ်မြို့နယ် #mindatchinstate #whatshappeninginmindat #Myanmarcoup
Leave a Reply