The Mindat Post
၁ ၊ မတ်လ ၊ ၂၀၂၆
ဒီနေ့ ၂၀၂၆ ခုနှစ်၊ ဖေဖော်ဝါရီလ ၂၈ ရက်နေ့မှာ အမေရိကန်နဲ့ အစ္စရေး ပူးပေါင်းတပ်ဖွဲ့တွေဟာ အီရန်နိုင်ငံအပေါ် စစ်ရေးအရ အကြီးစား တို၊က်ခို၊က် မှုတွေကို စတင်လိုက်တာ ဖြစ်ပါတယ်။
စစ်ဆင်ရေးအသေးစိတ်
ဒီစစ်ဆင်ရေးကို အမေရိကန်ဘက်က ‘Operation Epic Fury’ လို့ အမည်ပေးထားပြီး အစ္စရေးဘက်ကတော့ ‘Operation Roaring Lion’ လို့ အမည်ပေးထားပါတယ်။
သူတို့ ကြေညာထားတဲ့ အဓိက ရည်ရွယ်ချက်ကတော့ အီရန်ရဲ့ နျူကလီးယား အစီအစဉ်တွေကို အမြစ်ပြတ်ချေမှုန်းဖို့နဲ့ အီရန်အစိုးရရဲ့ စစ်ဘက်ဆိုင်ရာ ကွပ်ကဲမှုစနစ်တွေကို ဖြိုခွင်းဖို့ ဖြစ်တယ် လို့ အမေရိကန်က ဆိုပါတယ်။
လက်ရှိမှာတော့ အီရန်နိုင်ငံ တီဟီရန်မြို့တော်အပါအဝင် အစ္စဖာဟန်မြို့က နျူကလီးယားစခန်းတွေနဲ့ ခေါင်းဆောင်ပိုင်းတွေ နေထိုင်ရာ နေရာတွေကို အမေရိကန်နဲ့ အစ္စရေးရဲ့ ဒုံးကျည်တွေက ပစ်မှတ်ထား တိုက်ခိုက်နေတာပါ။
နောက်ခံအကြောင်းရင်း
ပြီးခဲ့တဲ့ ဖေဖော်ဝါရီလ ၁၉ ရက်နေ့က အမေရိကန် သမ္မတထရန့်က အီရန်ကို နျူကလီးယားသဘောတူညီချက်သစ်ချုပ်ဆိုဖို့ ၁၅ ရက်ကြာ ရာဇသံ ပေးခဲ့ပါတယ်။ ဒါပေမဲ့ သံတမန်ရေးအရ ဆွေးနွေးမှုတွေ ပျက်ပြားသွားခဲ့သလို၊ အီရန်ပြည်တွင်းမှာလည်း ဆန္ဒပြသူတွေကို အစိုးရက အကြမ်းဖက်နှိမ်နင်းခဲ့တာတွေကြောင့် အနောက်နိုင်ငံတွေရဲ့ သည်းခံနိုင်စွမ်း ကုန်ဆုံးသွားခဲ့တာလို့ ဆိုရမှာပါ။
အီရန် ရဲ့ တုံ့ပြန်မှုနှင့် လက်ရှိအခြေအနေ
အီရန်ဘက်ကလည်း ပြင်းပြင်းထန်ထန် တုံ့ပြန်နေပါတယ်။ ဘာရိန်း၊ UAE၊ ကာတာနဲ့ ကူဝိတ်နိုင်ငံတွေမှာရှိတဲ့ အမေရိကန် စစ်အခြေစိုက်စခန်းတွေကို ဒုံးကျည်တွေနဲ့ ပြန်လည်ပစ်ခတ်နေတာကြောင့် ဒေသတွင်း လေကြောင်းလိုင်းတွေအားလုံး ရပ်ဆိုင်းသွားပြီ ဖြစ်ပါတယ်။ ဒါ့အပြင် ကမ္ဘာ့ရေနံဈေးကွက်နဲ့ စွမ်းအင်ကဏ္ဍမှာလည်း ကြီးမားတဲ့ ခြိမ်းခြောက်မှုတွေ ဖြစ်ပေါ်နေတာပါ။
ကုလ နှင့် နိုင်ငံတကာ တုံ့ပြန်မှု နှင့် ခန့်မှန်းချက်
ကုလသမဂ္ဂ အတွင်းရေးမှူးချုပ်ကတော့ ဒါဟာ ‘ပျက်သုဉ်းခြင်းသံသရာ’ ဆီကို ဦးတည်နေပြီလို့ သတိပေးထားပြီး လုံခြုံရေးကောင်စီကလည်း အရေးပေါ် အစည်းအဝေး ခေါ်ယူထားပါတယ်။
စစ်ရေးလေ့လာသူတွေကတော့ ဒီစစ်ပွဲဟာ ရေရှည်တိုက်ခိုက်ရမယ့် ‘စစ်ပွဲ’ အသွင်မျိုး ကူးပြောင်းသွားနိုင်သလို၊ အဆိုးဆုံးအခြေအနေအနေနဲ့ အီရန်ဘက်က သူတို့ရဲ့ နောက်ဆုံးလက်နက်ဖြစ်တဲ့ နျူကလီးယားကိုပါ အသုံးပြုလာနိုင်တဲ့ အန္တရာယ်ရှိနေတယ်လို့ သုံးသပ်နေကြပါတယ်။
နိုင်ငံ တကာ သတင်းဌာန များ၏ သတင်းဖော်ပြ ချက်များ ကိုးကား၍ ပြန်လည်
စုစည်း တင်ပြခြင်းဖြစ်ပါသည်။
Photo – Aljazeera
________________________________________
■ The Mindat Post ၏ သတင်းများကို အောက်ဖော်ပြပါ လူမှုကွန်ရက်များတွင်လည်း ဖတ်ရှုနိုင်ပါသည်။
■ Telegram:
■ X (Twitter):
■ YouTube:
■ Website:
Leave a Reply