The Mindat Post (နည်းပညာသတင်း)
မေ ၁၂ ၊ ၂၀၂၂ ၊
Google က နှစ်စဉ် ကျင်းပမြဲဖြစ်သော Developer Conference ၌ ယခုကဲ့သို့ မီဇိုးဘာသာစကားကို ထည့်သွင်းခြင်းဖြစ်ကြောင်း စုံစမ်းသိရှိရသည်။
အဆိုပါ Conference ကို ၂၀၂၂ မေ ၁၁ နှင့် ၁၂ များတွင် ကျင်းပခြင်းဖြစ်ပြီး Google ၏ နည်းပညာဆိုင်ရာ Application များ အဆင့်မြှင့်တင်ခြင်း အပါအဝင် ဘာသာစကားအသစ် ၂၄ ခု ထပ်မံထည့်သွင်းခြင်းဖြစ်ကြောင်း သိရသည်။ ယင်းဘာသာစကားများ အသစ်ထပ်မံထည့်သွင်းမှုတွင် MLT ဟုခေါ်သည့် Machine Learning Technique နည်းပညာ အသုံးပြုထားကြောင်း မြင်တွေ့ရသည်။
Google ၏ ထိုသို့သော ဘာသာစကား ထပ်မံထည့်သွင်းမှုတွင် အိန္ဒိယနိုင်ငံ မှ ဘာသာစကား ၇ မျိုး ပါဝင်သည်။ မြန်နိုင်ငံနှင့် နယ်နိမိတ်ချင်းထိစပ်နေသော မီဇိုးရမ်ပြည်နယ်၏ ဘုံဘာသာ စကားဖြစ်သည့် (မီဇိုး) ဘာသာစကားနှင့် မဏိပူရပြည်နယ်သုံး မေတေး (ခေါ်) မယ်တိုင် ဘာသာစကားတို့ ပါဝင်လာခြင်းဖြစ်သည်။
ယင်းဘာသာ စကား (၂) မျိုးသည် Tibeto-Burman ဘာသာစကား အခွဲ နှစ်မျိူးဖြစ်ပြီး မြန်မာ၊ အိန္ဒိယနှင့် ဘင်္ဂလားဒေ့ရှ်နိုင်ငံများတွင် ပြောဆိုအသုံးပြုကြသည်။
ယခုကဲ့သို့ မီဇိုဘာသာစကား Google Translate တွင်ပါဝင်လာခြင်းသည် မီဇိုး ဘာသာစကားအဖွဲ့ အစည်းများနှင့် ပညာရှင်အသီးသီးက နှစ်ပေါင်းများစွာ ကိုယ်ထူကိုယ်ထ အားထုတ်ပါဝင် ကြိုးစားခဲ့ကြခြင်းဖြစ်ပြီး မီဇိုးရမ်ပြည်နယ် အစိုးရထံ ကူညီထောက်ပံ့မှု တစ်စုံတစ်ရာ တောင်းခံခဲ့ခြင်းမရှိကြောင်း မီဇိုးဘာသာစကားအဖွဲ့အစည်းနှင့် မီဇိုးယဉ်ကျေးမှု အသိုင်းအဝိုင်းတချို့ထံမှ သိရသည်။
အိန္ဒိယနိုင်ငံတွင် မီဇိုးဘာသာစကားကို လူဦးရေ ၈၃၀,၀၀၀ ဝန်းကျင်က အသုံးပြုလျက်ရှိပြီး မေးတေး (ခေါ်) မယ်တိုင် ဘာသာစကားကို လူဦးရေ ၂ သန်းဝန်းကျင်က အသုံးပြုလျက်ရှိသည်။
မီဇိုးရမ်ပြည်နယ်၊ အိုင်ဇောလ်မြို့ရှိ မီဇိုးရမ်တက္ကသိုလ်တွင် မီဇိုးဘာသာစကားကို ပညာရပ်တစ်ခု အနေဖြင့် သင်ကြားပေးလျက်ရှိပြီး မီဇိုးရမ်ပြည်နယ်တွင် မီဇိုးဘာသာစကားဖြင့် ထုတ်ဝေသော သိပ္ပံနှင့် နည်း ပညာ၊ ဥပဒေ၊ အနုပညာ သုတ/ ရသ စာအုပ်စာပေများနှင့် နေ့စဉ်ထုတ်သတင်းစာပေါင်းများစွာ ရှိနေသည့် အပြင် မီဇိုး ဘာသာစကားဖြင့် တင်ဆက်သည့် ရုပ်ရှင်၊ ဂီတနှင့် ရုပ်မြင်သံကြားအစီအစဉ်ပေါင်း များစွာလည်းရှိနေကြောင်းသိရသည်။
၂၀၂၁ ခုနှစ် မြန်မာနိုင်ငံတွင် စစ်ကောင်စီက အာဏာသိမ်းပြီးနောက် မြန်မာနိုင်ငံမှ ဒီမိုကရေစီအရေး တက်ကြွလှုပ်ရှားသူများနှင့် CDM ဝန်ထမ်းများအပါအဝင် နိုင်ငံရေးသမားများစွာသည် မီဇိုးရမ်ပြည်နယ်တွင် ဝင်ရောက်ခိုလှုံလျက်ရှိကြောင်းသိရသည်။
အိန္ဒိယနိုင်ငံ မီဇိုးရမ်ပြည်နယ်ရှိ မီဇိုးလူမျိုးများသည် မြန်မာနိုင်ငံ ချင်းပြည်နယ်ရှိ ချင်းလူမျိူးများနှင့် ယဉ်ကျေးမှု ထုံးတမ်းစဉ်လာအပါအဝင် ဘာသာစကားဆက်စပ်မှုများစွာရှိနေသည်။
(ယခု သတင်းဆောင်းပါးကို Mindat Post အယ်ဒီတာအဖွဲ့၏ ခွင့်ပြုချက်မပါဘဲ အခြားသော သတင်းစာမျက်နှာများနှင့် လူမှုကွန်ယက် မီဒီယာ စာမျက်နှာများတွင် ပြန်လည်ဖော်ပြခွင့်မပြုပါ။)
#themindatpost#MIZO#googletranslate#MizoLanguage#tibetoburman#india#Myanmar#mizoram#Manipur#meteilon
Leave a Reply