~~~~~~~
The Mindat Post
အောက်တိုဘာ ၇၊ ၂၀၂၂ ၊ မင်းတပ်
အောက်တိုဘာ ၈ ရက်၊ မနက်ဖြန်နေ့မှာ စစ်ကောင်စီက ဦးဆောင်ပြီး မင်းတပ်စည်ပင်ဈေးရှေ့မှာ ဈေးရောင်းပွဲထပ်မံကျင်းပမယ်လို့ ဒေသတွင်း သတင်းရင်းမြစ်တွေကနေတဆင့် သိရပါတယ်။
ဒီတခေါက် ဈေးရောင်းပွဲတွင် အသီးအရွက်ပါ ရောင်းချမှာဖြစ်ကြောင်းသိရပြီး မြေပြန့်ကနေ အသီးအရွက်နဲ့ အသားငါးတင်ဆောင်လာတဲ့ စျေးကားတွေ မင်းတပ်နယ်မြေခံတပ်ရင်း ခလရ ၂၇၄ တပ်ထဲကို ပစ္စည်းသွားရောက် ချထားနေကြောင်းစုံစမ်းသိရှိရပါတယ်။
မင်းတပ်မြို့နယ်အတွင်းကို စစ်ကောင်စီက ကုန်ပစ္စည်းတင်ပို့ခြင်းနှင့် စားသောက်ကုန်ပစ္စည်းများ သယ်ယူခွင့်ကို ကန့်သတ်ထားပြီး နယ်မြေခံတပ်ရင်းတွင်းရှိ စစ်ကောင်စီတပ်သားများ၏ မိသားစုဝင်များကသာ သယ်ယူရောင်းချခွင့်ရှိသည့် အနေအထားဖြစ်နေကြောင်း ဒေသခံတွေက ဆိုပါတယ်။
“အခုလို ဈေးရောင်းပေးတာက ကောင်းတယ်လို့ပဲ ပြောရမယ်၊ ဒီတိုင်းဆို ဝယ်ဖို့ခက်တယ်လေ၊ ပြီးတော့လည်း မင်းတပ်ဘက်ကို ရှူးရှဲကအစ ပိတ်ထားတော့ သူတို့ (စစ်ကောင်စီ) သယ်လာပြီး ရောင်းတာပဲ ဝယ်ရတော့တာပေါ့ ။ အသက်ရှင်သန်ဖို့ အရေး ဆိုတော့ ရတဲ့နည်းနဲ့ ယူရ ဝယ်ရတာပါပဲ” လို့ မင်းတပ်မြို့တွင်း နေထိုင်သူတစ်ဦးက The Mindat Post ကို ပြောပါတယ်။
စစ်ကောင်စီအနေနဲ့ မင်းတပ်မြို့တွင်းတွင် ဈေးရောင်းပွဲများ ကျင်းပတဲ့အသွင် ပြုလုပ်နေခြင်းမှာ မြို့တွင်းအခြေနေတည်ငြိမ် သယောင် လုပ်ဆောင်နေခြင်းမျိုးဖြစ်နိုင်ကြောင်း မင်းတပ် ဒေသခံ လူငယ်တစ်ဦးက The Mindat Post ကို ပြောပါတယ်။
“သူတို့က မြို့တွင်းမှာ အေးဆေးတည်ငြိမ်နေပြီ၊ သူတို့ ထိန်းချုပ်နိုင်နေပြီဆိုတာမျိုး ပြချင်တာလည်း ဖြစ်နိုင်ပါတယ်။ ပြီးတော့ သူတို့ တပ်တွင်းစီးပွားရှာကြတာလည်းဖြစ်မယ်” လို့ဆိုပါတယ်။
ပြီးခဲ့တဲ့ အောက်တိုဘာလ ၅ ရက်နေ့ မှာ CDF မင်းတပ်က မင်းတပ် နယ်မြေခံတပ်ရင်း ခလရ ၂၇၄ ကင်းစခန်း တစ်ခုကို သွားရောက်ပစ်ခတ်ခဲ့ပြီး စစ်ကောင်စီဘက် အထိအခိုက်အကျအဆုံးများနိုင်ကြောင်း CDF မင်းတပ်ဘက်က တရားဝင် ထုတ်ပြန်ခဲ့ပါတယ်။
စစ်ကောင်စီအနေနဲ့ မင်းတပ်မြို့တွင်းကို ထိန်းချုပ်ဖို့ အသည်းအသန် ရုန်းကန်နေရပြီး မြို့တွင်းကလမ်းဘေးဝဲယာတလျှောက် သံဆူးကြိုးအထပ်ထပ် ကာရံထားတယ်လို့လည်း ဒေသခံတွေထံကနေ သိရပါတယ်။
ပုံစာ – မင်းတပ်မြို့မှာ ဒုတိယအကြိမ်ပြုလုပ်မယ့် ဈေးရောင်းပွဲမတိုင်မီ မြင်ကွင်း။ (ဓာတ်ပုံ-HKL)
#themindatpost#whatshappeninginmindat#whatshappeninginmyamar#Myanmarcoup#mindatchinstate#cdfmindat#ဈေးရောင်းပွဲ
Leave a Reply